Ye tornata a nieu (de Chuan Chusé Bielsa)

Ye tornata la nieu
sobre os paisaches
e as imáchens,
e a distanzia e a intimidá
se son fincatas en os mons familiars,
en os tellatos blancos,
campanals, pinaretas
que puyan enta l'armita
d'o santo d'os miraglos,
San Macario.
As casas e as almas son niedos
cubiertos por o fredo.
Crema o fogaril.
Mi pai clama a más chen
ta calentar-se a l'amor d'o fuego.
Yo soi luen en a cambra zarrata
d'a poesía, sentindo sin beyer-los
os ambitos nebatos.
Recuerdo añadas
emboiratas de nino,
as mías altas botas blancas.

Cayó nieu tota la nuei,
tot ye enrebullato en o nebasco.
Se sienten palas fendo trañas.
Se sienten canchelons
cayendo a tierra,
l'airera ba escobando
as carreras, que son camins de chelo.
Fa un inte, chiclans emplenaban
de risos e chuegos os espazios.
Monchons de nieu sonrisarán
con a boca e con os güellos.
Yo m'alcuerdo d'os paxaros,
que en os pinos e en os güertos
e en os rafes _pobrez_ son callatos,
asperando.

Marcharé de tardis
sobre a nieu enta una caseta
a o canto d'un biñero.
Caminaré sobre blancos
de nineza, mundos articos e d'ensuenio
serán os campos e as sierras
allá luen. Ha creyato
a nieu zanzera planetas disiertos,
u satelites como Europa u Tritón.
Tot son mundos renobatos
asperando a fantasía d'o biachero.

Marcharé de tardis
por camins altos de nieu, emparatos
por as chepas d'as cuñestras.
Os campos conoxitos serán güe pachinas blancas,
os sembratos serán sulcos u crebazas
en as mars chelatas, acubillando
bida baxo a nieu e as bolismas en l'airera.
En l'aira xublidata un biello aladro
amostrará lo canto d'una querata esteba.

E a la fin iremos plegando en o biñero
e aguaitaremos os jarmientos entre o fredo,
plegaremos en a caseta perdita sobre os yermos.
As gatas royas ya i serán asperando,
irán esgarrapando a nieu que boza la gatera,
as gatas armitañas en o suyo mundo de silenzio.
O chiquet chardín será un chardín
de blancos suenios, molsudo e encantato.
O laurelero, a o canto d'os pedrizos
e a basa conchelata, tremolará friolenco.

E güellaré os Montalbos
como uns altros Pirineos,
ayer azuls e güe cubiertos por a nieu e o chelo.
Biachearé con o deseyo
sobre as suyas tucas aimatas
por o sol, os luscos e o misterio,
sobre o suyo cuerpo libre e sin de taca
que güe as boiras e os nebascos
reserban solo ta los dioses.

Chuan Chusé Bielsa

poema de Ánchel Conte

Una glarima ye cosa.
Un adiós sinse parabras
ye prencipio d'un día nuevo,
Pero tu no vierás més as boiras:
te yes feita boira, volas alta.
Yes boira n'a mesma boira
(1969)

.

Luz e güembra (de Ánchel Conte)

tallas en dos con a falz d’a tuya gollada l’aire trestallas nitidamén e limpia luz e uembra
yo me te miro e sinse bochar o prodichio aspero
talmén mesmo te tresbatas n’a sotil línia cuasi inestintén que divide luminaria e fosquera
dica delir-te-ie pero sabré tobrar-te amataus toz os sentius zarrada boca estreñius uellos
sinse odíu fato ni tauto no seguindo si que o zaguer leve sospiro esmuyiu d’o tuyo peito
bisa que enta tu n’o suyo soflo me leva


Fuande: Queremos más obras de Anchel Conte

Baixo Vueltas Azuls (De Ánchel Conte)

ixa parola que se dibuixa n’os tuyos labios
brila como cuca de luz en nueit sinse estrelas
sona á serol d’aire sondormiu entre arboleras
á gorgollo d’augua de fontanal en tardi calient de mayo
te me miro d’alto t‘abaixo
e m’aturo astí an ixa parabra encara no dita m’aspera
la te furto t’acubillar-la n’as mans s ta tu ubiertas
e entre vueltas azuls volumens e lumbreras que en paz me cubren
como si de tu se tratase amorosiar-la e adormirme acollau é ela

.

Camín de ninón (semana 13) - De Víctor Guíu

O feto amadura ta crecer.

Como fruita verda,

ixa mesma que zarandean airegueras, auguas,

asperando-se-ne retratos d´estiu.

U picotazos de picarazas emberenatas.

A pregunta de qué será aparixe de nuebo.

Mientres a mai bi ye sensual, prexinata,

imachen segundiata per os sieglos.

(Os chiquez lo sapen).

Anque s´amaguen e aspiren fumarros d´aclamata  e culpa,

l´enfuelgo de Andrea, os suyos güellos despiertos,

e ros cariños de Mario,

e carantoñas.

Son biaches cara l´enfinito,

mil boces cara l´abismo.

……………………………..

O parte diz que luen de aquí aparixe Ben Laden con un tiro n´a capeza.

Dengún lo beye, á dengún importa.

O ninón será ra mía bida en bel inte,

e agora bi ye n´o utero d´asperanzas.

I será uno,

e con busatros,

os míos gúellos,

bersos e poemas.

Solo lo sol de l'Alma (de Chuan Chusé Bielsa)

O día ye zarrando
los suyos güellos.
Purnetas en a cambra
fosca. ¡Qué pocos ya quedamos!
Unas ultimas mans aparando
a ultima calentor.

Solo lo sol de l'Alma.

A tardada, qué larga
parixeba, s'endormisquiaba
aparando as rayadas
d'un sol que s'eslanguiba.
As oras se bandiaban
en as olas d'o silenzio.

Solo lo sol de l'Alma.

Rematan en o día
as zagueras luminarias.
En que o sol s'amaga
astí ye a luna, perfecta
ostia que a bonico puya
sobre a montaña sacra.

Solo lo sol de l'Alma.

Qué eterno lo tiempo
parixeba. En o maitín
teneba la cara fresca de l'augua
u a clara ilusión d'un nino.
Y a o meyodía cremaba,
tot pleno de flamas furas
que contra o mundo luitaban.

Solo lo sol de l'Alma.

Remató lo día, a o cabo.
En o fogaril s'amortoron
as estrelas d'o calivo;
solenca quedó a casa
en que vivié. S'amortaban
una a una las estrelas allá luen.
S'amortó a la fin a nuei, se tornó blanca.

Solo lo sol de l'Alma.

Chuan Chusé Bielsa

IXAR

D´o Biache feito por "Os Zerrigüeltaires" en l´añada 85.


-------------------------------------

ÍXAR

Íxar (en arabe: “tozal de pietra d´arena”) ye conoxita por os romans con os nomes Arse y Darse. S´alcuentra a 15O kms. ta lo noreste de Tergüel capetal, a 291 mts. d´alzarria chunto l´arriu Martín. O casalar ye plantificau engradonato en a costera d´un tozal. Tien bellas dos milentas d´abitadors, adedicaus más que más a l´agricultura y lo bestiar de tozinos y obellas.

As fiestas grans son pa lo 21 d´agosto y a más sonata -como n´Alcañiz- a Semana Santa, con a zelebrazión d´o Tambor y o Bombo. La d´Ixar ye, posiblemén, la más antiga y tradizional, como lo contrimuestra l´estar declarata “Fiesta de Interés Turístico Nacional”.

En a meya nueit d´o Chuebes Santo se i fa la “rompida de la hora” en a Plaza España, un momén emozionán y de difízil xuplidar, en o que más d´a milenta de presonas bistitas con tunicas negras tocan de bez os suyos atambors. Dica ra tardi d´o Sabado Santo ros atambors y bombos no dixan de i retombar estrapaluziosamén por todas as carreras d´Íxar, en prosezión u por collas. Iste costumbre esdebiene de lo 1.519 cuan Luis Fernández de Heredia, cuarteno Duque d´Íxar, encomienda a os franziscans a faina d´atrapaziar-lo seguntes o riedo catolico. Dinantis d´ixo, as chens s´achuntaban bistindo lo sayal negro, a cara bozata y tocando trastes y rudiosos -carraclas, matracas, ezetra- como protesta por a muert de Cristo.

A los d´Íxar lis izen “rabinos” y tienen istos ditos tocantes a lo mote y a los de bels lucars bizins:

“En Castelnou, aliagueros

por necesidad lo son.

Y en Híjar rabinos

y cheches en Obón”.

“Los de Híjar son rabinos,

los de Urrea cañiceros,

Albalate sompreñaus

y Ariño los farineros”.

“En Obón revuelan cheches,

en Alloza la cuchara,

los gitanos en Oliete

y en Híjar las chicas guapas”.

“En Hijar hay un convento

con portal de tres arcadas,

en Samper Santa Quiteria

que quita el mal de la rabia,

en la Puebla buenos mozos

para tirar a la barra”.

A billa d´Íxar estió conquerita por Galín Ximénez, siñor de Belchit, en tiampos de Remón Belenguer IV, rechén d´a Corona d´Aragón. Chaime I acorporó Íxar ta lo Raino d´Aragón, a truca de Tierga, en 1.267; legando a Baronía a lo suyo fillo don Pedro Fernández d´Íxar. Lo 1.483 os Rais Catolicos acobaltan o siñorío d´Íxar ta lo ran de Ducato.

En ista redolada estió mayoritaria la poblazión de moriagos dica ra suya forachitanzia a empezallos d´o sieglo XVII, qu´estió repoblata por chens promanans -más que más- de os pirinés aragoneses.

En a gambada por Íxar alufran que bi ha tres bicos bian esferenziatos con estrazios d´o debanpasau: o moriago (“La Parroquia”), o chodigo (“San Antón”) y o crestián (“La Villa”).

En o bico moriago de La Parroquia sopreixen os callizos suyos y a Plaza con a capiella d´a Birchen d´Arcos u Madalena, d´estilo mudéxar. A chudería ye en o bico de San Antón, con a Plaza y carreras de L´Azaguán y Jesús, pa plegar en l´armita de San Antón, antiga sinagoga dica qu´estieron forachitaus os chodigos en 1.492.

En o bico de “La Villa”, o más proxemo ta l´arriu Martín, i sopreix lo palaz barroco d´o Barón d´Ara y l´Achuntamién con a suya Lonxa; dend´astí se´n puya dica ta ra ilesia de Santa María y os repuis de l´antigo Castiello d´Íxar, de lo sieglo X.

En una carrera s´enziertan con uns biellos y una muller con os que i pillan güen capazo en tocante a motes, toponimos, ditos y bocables aragoneses fablaus en a billa.

Uno d´els lis diz: “yo soy mesache”, esplicotiando desiguida que ye d´a familia de “los Mesaches”. A parola que más lis truca ye “zipizero” y atras intresans son:“farina”,”zagal”,”falz”,”astral” y “finollo” (que remeraban que la diziban de chobens); as rematanzas d´os achiquidors las fan en -ICO.

MALLO INABASTABLE (de Ánchel Conte)

silencio
potén muralla que s’alza ocultando ubiertos paisaches mars incoloros albos desiertos
inerme deván d’ela arrullo parolas reples cantals cuentra tanto muro inabastable mallo
..
pacién aguardo
..
sé que á la fin una sola parabra de misterios plena ixarnará parez obrará o miraglo

Fuande: Queremos más obras de ÁNchel Conte

OS ZERRIGÜELTAIRES

Petenatas de dos amius aragoneses en escorsas por Aragón durán 30 añatas

http://oszerrigueltaires.wordpress.com/ 

Migalánchel Martín Pardos y Migalánchel Pérez Gil se conoxioron en l’año 1.982, de primeras en o curso d’aragonés d’a “Colla Chobenil” d´a Casa de Chobentú “Zidá Chardín”, en a carrera Martín Cortés de Zirigoza, y sobre tot, en a 1er. Gambada Pirinenca que se desembolicó por os Pirinés d’Aragón durán 15 diyas, dende Torla dica Cornudella de Baliera (Arén).

Os “Tocayos” Migalánchel fazioron güena pacha dende lo primer inte, en tenendo d’ilusions e intreses parellanos por as montañas, lucars, natura, luenga y costumbres, empezipiando-ie una gran amistanza.

L’orichen d’a denominazión “Zerrigüeltaires”, esdebiene d’o emplego familiar d’o bocable “Zerrigüelta” y como alufraban que en as gambadas difizilmén marchaban en dreitura, les surtió por bel casual ista motada.

D’astí enta debán, n’ixos primers tiampos consiguioron marchar chuntos ta ros pirinés bellas begatas por año. En istas añatas primerengas completaban lurs petenatas, de trazas espontanias y rozeras, con grabazions en as localidaz qu’iban besitando, rispeutibe a ditos, cantas, toponimos, costumbres y -más que más- dixendas en a fabla local.

Dimpuesas, más t’adebán, en no poder yir Migalánchel Pérez tan a ormino, ros biaches de conchunta se siguioron fendo una begata á l’año y, por l’inte, encara continan con ixa tradizión.

Ers se sianten argullosos d’estar amius á l’arreyo de tantas añatas; magueras que ya no plandan tan fuarz como en primerías, continan goyando d’as escorsas como lo primer diya.

N’iste blog biluengue quiaren amostrar -beyer INDICE COMENTARIOS CON FOTOS- en castellán (os d’a letra ″a″ que alcompaña a os lumeros) y en bersions amanatas ta ras multiples barians de l’aragonés d’as redolatas besitatas (os d’a letra ″b″), quiénto bi estioron cada añata; chunto con as remeranzas y os afotos qu’en han d’ixa delera tan grandiza por conoxer os lucarons, as chens y as marabiellas naturals d’ista quiasta tiarra.

CHARLA-MESA REDONDA CON MOTIVO DEL DÍA INTERNACIONAL DE LA LENGUA MATERNA

“La biblioteca de las Lenguas de Aragón (Ferrández de Heredia, J. Costa, Saroïhandy, Otín, el E.F.A.,… y el aragonés)”

Coordina: José Ignacio López Susín (Sociedad Cultural Aladrada)

Participan también: Pilar Benítez, Óscar Latas, Francho Nagore, Rafel Vidaller

Día 25 de febrero a las 20:00 h en la Facultad de Ciencias Humanas y de la Educación (c / Carderera, 4)

Organiza:

Diploma de Especialización

en Filología Aragonesa